బాబు వెకేట్ పిటిషన్లు మరో బెంచ్ కు బదిలీ

చంద్రబాబునాయుడు అక్రమాస్తుల కేసు విచారణను హైకోర్టు ఈనెల 12వ తేదీకి వాయిదా వేసింది. ఈ కేసులో దాఖలైన వెకేట్ పిటిషన్లు జస్టిస్ ఈశ్వరయ్య బెంచ్ నుంచి మరో బెంచ్‑కు బదిలీ అయ్యాయి. చంద్రబాబు తదితరుల అనుబంధ పిటిషన్లు ఏ బెంచ్ విచారించాలనేది హైకోర్టు ప్రధాన న్యాయమూర్తి నిర్ణయం మేరకు ఉంటుంది. 

కాగా అంతకు ముందు జస్టిస్ ఈశ్వరయ్య బెంచ్ ముందు వాదనలు వినిపించటానికి పిటిషనర్ వైఎస్ విజయమ్మ తరపు న్యాయవాది సుశీల్ కుమార్ నిరాకరించారు. బెంచ్ ముందు వాదనలు వినిపించేందుకు ఆయన అనేక అభ్యంతరాలు వ్యక్తం చేశారు. గతంలో చంద్రబాబుకు అనుకూలంగా జస్టిస్ ఈశ్వరయ్య తీర్పులు ఇచ్చారన్నారు. 

జస్టిస్ ఈశ్వరయ్య బెంచ్ ముందుకు వెకేట్ పిటిషన్లు వచ్చేలా చంద్రబాబునాయుడు ఓ పథకం ప్రకారం వ్యవహరించారని సుశీల్ కుమార్ తన వాదనలు వినిపించారు. వాస్తవానికి నాట్ బిఫోర్ అనే అంశం రాజ్యాంగంలో ఎక్కడా లేదని, పరిపాలన సులభంగా సాగించుకోవటానికే న్యాయస్థానం నాట్ బిఫోర్ ను ఉపయోగించుకుంటుందన్నారు. ఇప్పుడు ఆ అంశాన్ని వినియోగించుకోవటం విండో షాపింగ్ కాక మరేంటి అని సుశీల్ కుమార్ ప్రశ్నించారు.